Нашата фудбалска репрезентација претпладнево го одржа планиран тренинг за денеска во својата база во Вилах-Австрија , а селекторот Мирсад Јонуз одлучи во попладневните часови да не се тренира туку планираниот термин да се искористи за прошетка. Селекторот Јонуз нема проблеми со играчите и најави сериозен пристап кон дуелот со Романците:

„Денеска го одржавме првиот тренинг од кои сум многу задоволен и затоа одлучивме попладневниот тренинг да го откажеме и наместо тоа како награда за одличната атмосфера што владее во базата и помеѓу репрезентативците се договоривме да одиме на прошетка и шопинг во Клагенфурт. В среда не очекува голем предизвик за кој многу сериозно се подготвуваме и ќе се обидеме и без нашиот најдобар играч Горан Пандев да му се спротиставиме на романскиот тим кој секогаш досега бил незгоден противник за нас , а против себе ќе имаме и играч кој заедно со Пандев ја освои шампионската лига, извонредниот Кристијан Киву.

Добро е што во нашиот тим немаме повредени, единствено Деспотовски, Тодоровски и Грозданоски тренираат со посебен режим бидејќи заработија мали повреди на натпреварот со Азербејџан , но се надевам до среда да бидат сите фит„ изјавил Мирсад Јонуз за веб страната на ФФМ.

Селекторот на националниот тим на Македонија до 21г. Бобан Бабунски денеска го објави списокот на фудбалери кои ќе настапат на пријателскиот натпревар со селекцијата на БиХ што ќе се одигра во Кладуша на 5. Јуни со почеток во 17 часот.

За овој натпевар ги повикал сите потенцијални кандидати кои настапуваат во домашниот шампионат и кои по се она што се случуваше заслужуваат да добијат вистинска шанса да ги потврдат своите квалитети. Секако со вакви натпревари ќе се оствари континуитет за она што не очекува до крајот на овој циклус и секако по заминувањето на дел од играчите кои ќе го загубат правото на настап за следниот циклус. 

Собирот на репрезентативците е денеска  и нашите репрезентативци ќе се подготвуваат наредните неколку денови се до заминувањето за Кладуша на 4-ти Јуни.